ԿԱՅԱՑԱՎ ԲՀԿ ՊԱՇՏՈՆԱԿԱՆ ԿԱՅՔԻ ՇՆՈՐՀԱՆԴԵՍԸ

Ապրիլի 30-ին «Կոնգրես» հյուրանոցում կայացավ «Բարգավաճ Հայաստան» կուսակցության պաշտոնական կայքի և «Հասարակության հետ կապի նոր վեբ գործիքների» շնորհանդեսը:

ԲՀԿ նախագահ Գագիկ Ծառուկյանի մամլո խոսնակ Խաչիկ Գալստյանը և «Բարգավաճ Հայաստան» կուսակցության «Հասարակության հետ կապի նոր վեբ գործիքներ» ծրագրի համակարգող Հայկ Ակարմազյանը հանրությանը և լրագրողներին ներկայացրեցին ԲՀԿ պաշտոնական կայքը, կուսակցության էջը «Յութուբ» վիդեոալիքում, կուսակցության բլոգը «Վորդպրես» հեղինակավոր կայքում, անդրադարձան  նաև մշակված մյուս գործիքներին:

ԲՀԿ նախագահ Գագիկ Ծառուկյանի մամլո խոսնակ Խաչիկ Գալստյանը նշեց, որ ԲՀԿ էլեկտրոնային գործիքները առավել թափանցիկ և անմիջական են դարձնում «Բարգավաճ Հայաստան» կուսակցության և հասարակության միջև կապը, նպաստում են լրագրողների հետ համագործակցության արդյունավետության բարձրացմանը:

«Մշակված նոր գործիքները նպատակ ունեն մեր հանրությանը լիարժեք ներկայացնել «Բարգավաճ Հայաստան» կուսակցության առաջնորդ Գագիկ Ծառուկյանի հասարակական-քաղաքական գործունեությունը, էլ ավելի թափանցիկ դարձնել, ինչպես նաեւ բարձրացնել կուսակցության ու հասարակության լայն շերտերի միջեւ փոխադարձ կապերի եւ հաղորդակցության մակարդակը»,-ելույթում նշեց պրն. Գալստյանը:

«Բարգավաճ Հայաստան» կուսակցության «Հասարակության հետ կապի նոր վեբ գործիքներ» ծրագրի համակարգող Հայկ Ակարմազյանը ներկայացրեց էլեկտրոնային տեղեկատվական միջավայրում կիրառվող ԲՀԿ վեբ գործիքների լայն համալիրը՝ ընդգծելով յուրաքանչյուր էլ. գործիքի դերը և առանձնահատկությունը: Պրն. Ակարմազյանը նշեց, որ ԲՀԿ պաշտոնական կայքը ամեն օր թարմացվում է, գործում է հայերեն, ռուսերեն և անգլերեն տարբերակներով, կայքում տեղադրվում է տեղեկատվություն «Բարգավաճ Հայաստան» կուսակցության, ինչպես նաև ԲՀԿ նախագահ Գագիկ Ծառուկյանի գործունեության մասին: «Իսկ «Բարգավաճ Հայաստան» կուսակցության բլոգը նախագծված է հասարակության հետ անմիջական կապն էլ ավելի ամրապնդելու և հասարակության կարծիքին ծանոթանալու համար»,-նշեց պրն. Ակարմազյանը:

Լրագրողների ուշադրությանը ներկայացվեց նաև ԲՀԿ վիդեոալիքը «Յութուբ» հեղինակավոր վիդեոբլոգում: «Յութուբում» տեղադրված են կուսակցության նախագահ   Գագիկ Ծառուկյանի և Կուսակցության գործունեության մասին տեսանյութեր՝ համառոտ մեկնաբանություններով: «Կուսակցության համակիրները գործունեություն են իրականացնում նաև սոցիալական ցանցերում, դրանցից է «Ֆեյսբուք» սոցիալական ցանցը»,-տեղեկացրեց պրն. Ակարմազյանը:

Ներկայացվեց նաև ԲՀԿ նախագահ Գագիկ Ծառուկյանի էջը «Վիքիպեդիա» ազատ հանրագիտարանում հայերեն և ռուսերեն տարբերակներով: Այս էջերում մանրամասն ներկայացված է Գագիկ Ծառուկյանի կենսագրությունը, ինչպես նաև պրն. Ծառուկյանի քաղաքական գործունեությունը և բիզնես կարյերան:

Միջոցառման ավարտին բանախոսները պատասխանեցին լրագրողների հարցերին:

ՇՈՒՐՋ ՀԱԶԱՐ ՈՒՍԱՆՈՂՆԵՐ ԱՆԴԱՄԱԳՐՎԵՑԻՆ «ԲԱՐԳԱՎԱՃ ՀԱՅԱՍՏԱՆ» ԿՈՒՍԱԿՑՈՒԹՅԱՆԸ

Ապրիլի 23-ին «Արմենիա Մարիոթ» հյուրանոցի «Տիգրան Մեծ» դահլիճում տեղի ունեցավ 17 պետական և ոչ պետական բուհեր ներկայացնող շուրջ հազար ուսանողների՝ «Բարգավաճ Հայաստան» կուսակցությանն անդամակցության հանդիսավոր արարողությունը: Երիտասարդներին ողջունելու և շնորհավորելու էր եկել «Բարգավաճ Հայաստան» կուսակցության նախագահ Գագիկ Ծառուկյանը: Միջոցառումը մեկնարկեց ուսանողների հանդիսավոր երդման արարողությամբ:

Բացման խոսքով հանդես եկավ ԲՀԿ Քաղաքական խորհրդի անդամ Հայկ Ակարմազյանը: Նա նշեց, որ այս օրը կրկնակի հիշարժան է, հազարավոր ուսանողներ համալրում են ԲՀԿ շարքերը, ովքեր միավորում են ուսանողությանը՝ մասնակցելու քաղաքական ակտիվ գործունեությանը: «Հզոր և զարգացած երկրում ապրել ցանկացող երիտասարդը կամ ուսանողը ունի բազմաթիվ առիթներ, որոնք հավատ են ներշնչում միանալու «Բարգավաճ Հայաստան» կուսակցությանը: Կնշեմ դրանցից մեկը. երիտասարդը պետք է ունենա ինքնադրսևորման հնարավորություն: Այսօր մեր երիտասարդը ոչ թե խոսքով, այլ գործով երկրի ապագայով մտահոգ ուժեղ ղեկավարի կարիքն ունի»,- ելույթում նշեց Հ. Ակարմազյանը:

Տարբեր բուհեր ներկայացնող ուսանողներ նույնպես ցանկացան իրենց խոսքն ասել ներկաներին: Երևանի պետական համալսարանի քաղաքագիտության մագիստրոս Էրիկ Ղազարյանը նշեց, որ ԲՀԿ-ին անդամակցելը իրենց առաջին և համարձակ քայլելից մեկն է դեպի միասնական նպատակի իրականացում՝ «կառուցելու բարգավաճ և հզոր հայրենիք»: «Ես անդամակցել եմ այս կուսակցությանը, քանի որ վստահ եմ, որ հենց «Բարգավաճ Հայաստան» կուսակցությունը, Գագիկ Ծառուկյանի առաջնորդությամբ, հզորացնելու և շենացնելու է մեր երկիրը»,-նշեց Էրիկ Ղազարյանը:

Անդամագրված երիտասարդների շրջանում մեծ էր ուսանողուհիների թիվը: Նրանց անունից ելույթ ունեցավ Նարե Սահակյանը, ով նշեց, որ «Բարգավաճ Հայաստան» կուսակցությունում ցանկացած խոսք գործ է դառնում: «Մենք գիտենք, որ կուսակցությունում գործում է ԲՀԿ Կանանց խորհուրդը, որի հետ համատեղ ծրագրեր կցանկանայինք իրականացնել»,-նշեց Նարե Սահակյանը:

Հանդիսավոր արարողության պաշտոնական ավարտին ուսանողներին շնորհավորեց ԲՀԿ նախագահ Գագիկ Ծառուկյանը՝ նշելով որ այսուհետև նոր անդամագրված ուսանողները կուսակցության վստահելի անդամներն են:  «Սիրելի ուսանողներ, տեսնելով ձեր դեմքի փայլն ու ժպիտը, շատ հուզված եմ, և ևս մեկ անգամ պարտավորված եմ զգում ձեր նկատմամբ լինելու ավելի ուշադիր և հետևողական: Այսօր շատ կարևոր և պատասխանատու օր է: Անցնում եք կուսակցության շարքերը և ԲՀԿ-ի վստահելի գործընկերներն եք: Միասին պետք է իրականացնենք մեր ծրագրերը»,-ուսանողներին ողջունելիս նշեց ԲՀԿ նախագահ Գագիկ Ծառուկյանը:

Միջոցառման պաշտոնական հատվածի ավարտից հետո, հյուրասիրության ընթացքում, պրն. Ծառուկյանը ոչ պաշտոնական միջավայրում շփվեց երիտասարդների հետ, ծանոթացավ նրանց առաջարկներին: ԲՀԿ նախագահ Գագիկ Ծառուկյանը երիտասարդների հետ բաժակ բարձրացրեց և շնորհավորեց նրանց կուսակցությանն անդամակցության կապակցությամբ:

ԿԱՅԱՑԱՎ ԲՀԿ ՆՈՐ ՎԵԲ ԳՈՐԾԻՔՆԵՐԻ ՈՉ ՖՈՐՄԱԼ ՇՆՈՐՀԱՆԴԵՍԸ

Այսօր Հայաստանի Ամերիկյան համալսարանում կայացավ «Բարգավաճ Հայաստան» կուսակցության հասարակության հետ կապերի նոր վեբ գործիքների ներկայացումը: «Բարքեմփ» միջոցառման շրջանակներում իրականացված ծրագրի  ընթացքում ինֆորմացիոն տեխնոլոգիաների մասնագետներին, բլոգերներին, լրագրողներին և արտասահմանից ժամանած հյուրերին կայքի խմբագրությունը ներկայացրեց «Բարգավաճ Հայաստան» կուսակցության բլոգը, ԲՀԿ էջերը «Յութուբ» վիդեոալիքում, «Ֆոտոբլոգ» և «Ֆոտոբուքետ» բլոգերում:

Միջոցառմանը ներկայացվեց նաև «Բարգավաճ Հայաստան» կուսակցության համակիրների գործունեությունը ինտերնետ միջավայրում: Անդրադարձ եղավ Ֆեյսբուքում «Բարգավաճ Հայաստան» կուսակցության աջակիցների կողմից մշակված էջերին(“Bargavach Hayastan” յուզեր կամ “Prosperous Armenia party” խումբ), դրանց կառուցվածքին և գործունեությանը: Ներկայացմանը հաջորդեց հարց-պատասխան և քննարկում:

Շուտով կկայանա «Բարգավաճ Հայաստան» կուսակցության պաշտոնական կայքի, ինչպես նաև հասարակության հետ կապերի նոր վեբ գործիքների պաշտոնական շնորհանդեսը: Միջոցառման մասին տեղեկությունը կտարածվի ԲՀԿ վեբ գործիքներով:

ԽԱՉԻԿ ԳԱԼՍՏՅԱՆ. «ԲՈԼՈՐ ՆԱԽԱԴՐԱՅԼՆԵՐՆ ՈՒՆԵՆՔ ՀԱՂԹԵԼՈՒ ՀԱՄԱՐ»

Այսօր  «Ազդակ» ակումբի հյուրն էր ԲՀԿ նախագահ Գագիկ Ծառուկյանի մամուլի խոսնակ Խաչիկ Գալստյանը. ասուլիսի թեման էր «ԲՀԿ-ի՝ հաղթանակի հասնելու հնարավորությունները Երևանի ավագանու ընտրություններում»: «Բարգավաճ Հայաստան» կուսակցությունը գրեթե ավարտել է նախընտրական շտաբերի և ենթաշտաբերի ձևավորումը: Եթե ընտրությունները կայանային վաղը, մենք պատրաստ ենք բարձր մակարդակով ընտրապայքարին մասնակցելու:  Կուսակցության թեկնածու Հարություն Քուշկյանը վայելում է երևանցիների հարգանքը: Մենք բոլոր նախադրյալներն ունենք ընտրություններում հաղթելու համար»,-տեղեկացրեց Խաչիկ Գալստյանը:

 

«Ո՞վ է «Բարգավաճ Հայաստան» կուսակցության հիմնական մրցակիցը» հարցին Խաչիկ Գալստյանը պատասխանեց, որ կուսակցությունը բոլոր մրցակիցներին էլ հարգանքով է վերաբերում: «Կարծում եմ՝ հիմնական պայքարը կծավալվի «Բարգավաճ Հայաստանի», ՀՀԿ-ի և ՀԱԿ-ի առաջադրած թեկնածուների միջև»,-հավելեց Խաչիկ Գալստյանը:

Լրագրողներին հետաքրքեց նաև «Բարգավաճ Հայաստան» կուսակցության դիրքորոշումը վերջերս մամուլում հայտնված «100 տոկոսանոց» ցուցակների շուրջ: «Մենք վստահ ենք, որ մայիսի 31-ին կայանալիք ընտրություններում երևանցին քվեարկելու է՝ առաջնորդվելով իր խղճով, մենք այդ օրն ամեն ինչ անելու ենք երևանցու ազատ ընտության իրավունքն ապահովելու համար: Երևանի ավագանու ընտրությունների համար նախատեսված շուրջ 430 ընտրատեղամասերից շատերում ունենալու ենք մեր վստահված անձանց, հանձնաժողովի անդամներին, ովքեր անելու են հնարավորը Երևանի ավագանու ընտրություններն ազատ և թափանցիկ անցկացնելու համար»,-նշեց Խաչիկ Գալստյանը:

Խաչիկ Գալստյանն անդրադարձավ նաև հայ-թուրքական սահմանի բացման հնարավորությանը, ինչպես նաև այս հարցի շուրջ կուսակցության դիրքորոշմանը: «Իհարկե, հայ-թուրքական սահմանի բացումը դրական քայլ է երկու պետությունների համար, սակայն հայ-թուրքական սահմանը պետք է բացվի առանց որևէ նախապայմանների, սա է կուսակցության դիրքորոշումը»,-վստահ է Գագիկ Ծառուկյանի մամուլի խոսնակը:Խաչիկ Գալստյանը ներկայացրեց նաև ՀԱՕԿ-ի նախագահ Գագիկ Ծառուկյանի գլխավորած պատվիրակության այցը Լեռնային Ղարաբաղ:  ԼՂՀ նախագահ Բակո Սահակյանի հետ Գագիկ Ծառուկյանի գլխավորած պատվիրակությունը պայմանավորվածություն է ձեռք բերել Լեռնային Ղարաբաղի Հանրապետությունում կառուցել նախադեպը չունեցող մարզական համալիր: «Համալիրի կառուցման համար ներդրվելու է 2 միլիոն ԱՄՆ դոլարին համարժեք դրամ: Մարզական համալիրը մեծապես կնպաստի Լեռնային Ղարաբաղի Հանրապետությունում խոստումնալից մարզիկների բացահայտմանը»,- ասուլիսի ավարտին տեղեկացրեց Խաչիկ Գալստյանը:

 

«ՁԵՐ ԱՆՍԱՀՄԱՆ ՍԻՐՈՒՆ ՈՒ ՀՈԳԱՏԱՐՈՒԹՅԱՆԸ ՈՉԻՆՉ և ՈՉ ՈՔ ՉԻ ԿԱՐՈՂ ՓՈԽԱՐԻՆԵԼ»

«Բարգավաճ Հայաստան» կուսակցության նախագահ Գագիկ Ծառուկյանի շնորհավորական ուղերձը Ապրիլի 7-ի առիթով

Մայրության և գեղեցկության այս անզուգական տոնի առիթով սրտանց շնորհավորում եմ հայոց աշխարհի բոլոր կանանց ու մայրերին։

Ձեր անսահման սիրուն, նվիրվածությանն ու հոգատարությանը աշխարհում ոչինչ և ոչ ոք չի կարող փոխարինել, սիրելի մայրեր։ Ձեր զավակների համար Դուք անկրկնելին ու միակն եք, անգնահատելի է Ձեր դերը ընտանիքում, հասարակությունում և պետության մեջ։ Մաղթում եմ, որ գարնանային այս հիասքանչ օրը Դուք վայելեք միայն երջանկության, սիրո և բերկրանքի անսպառ պահեր։

Աստվածածնի ավետման այս օրը ցանկանում եմ, որ Սուրբ Մարիամ Աստվածածինը լինի պահապան Ձեր ընտանիքներին ու զավակներին։ Կրկին ու կրկին շնորհավորելով մեր մայրերին ու կանանց այս գեղեցիկ տոնի առիթով` հավատացած եմ, որ հայ կնոջ առաքինի, սիրառատ ու բարեգութ կերպարը բոլոր սերունդների համար հավերժ կմնա որպես իդեալական կնոջ մարմնացում։

«ԲարգավաՃ Հայաստան» կուսակցության
նախագահ Գագիկ Ծառուկյան

ԳԱԳԻԿ ԾԱՌՈՒԿՅԱՆ. «ԲՈԼՈՐ ԿՈՒՍԱԿՑՈՒԹՅՈՒՆՆԵՐԸ ՊԵՏՔ Է ՊԱՅՔԱՐԵՆ ԱՐԴԱՐ ԸՆՏՐՈՒԹՅՈՒՆՆԵՐԻ ՀԱՄԱՐ»

ԱԺ «Բարգավաճ Հայաստան»  խմբակցության ղեկավար Գագիկ Ծառուկյանը  լրագրողներին ներկայացրեց Հայաստանում համաշխարհային տնտեսական ճգնաժամի հետևանքները, ինչպես նաև դրանք հաղթահարելու ուղիները: Գործարար Գագիկ Ծառուկյանը նշեց, որ տնտեսական ճգնաժամը ազդում է ողջ պետության, հատկապես գործարարների վրա, այնուամենայնիվ, ԲՀԿ նախագահը ևս մեկ անգամ լրագրողներին տեղեկացրեց, որ անկախ ստեղծված տնտեսական բարդ պայմաններից, որևէ աշխատատեղի կրճատում չի լինելու:

Լրագրողների ուշադրության կենտրոնում էր նաև Երևանի ավագանու ընտրությունները: Գագիկ Ծառուկյանը նշեց, որ վստահ է կուսակցության ուժերին և բարձր է գնահատում «Բարգավաճ Հայաստան» կուսակցության՝ ընտրություններում հաղթելու հավանականությունը: «Իմ հնարավորությունները ես շատ լավ գիտեմ, հավատում եմ ինքս իմ սկզբունքին, իմ կուսակցությանը, մեր հաղթանակին»,-ավելացրեց պրն. Ծառուկյանը:

Լրագրողների հետ հանդիպման ավարտին պրն. Ծառուկյանը նշեց, որ Երևանի քաղաքացիները կընտրեն այն կուսակցությանը, որն իր խոսքը գործով է ապացուցել: «Մենք ցանկանում ենք, որ կայանան արդար ընտրություններ:  Բոլոր կուսակցությունները պետք է պայքարեն արդար ընտրությունների համար»,-հավելեց ԲՀԿ նախագահ Գագիկ Ծառուկյանը:

ԳԱԳԻԿ ԾԱՌՈՒԿՅԱՆ. «ՄԵՐ ԽՈՍՔԸ ԳՈՐԾ Է, ԵՎ ՄԵՆՔ ՀԱՂԹԵԼՈՒ ԵՆՔ»

Աղբյուր՝ «Առավոտ» օրաթերթ

- «Բարգավաճ Հայաստանը» եւս մյուս կուսակցությունների նման հայտարարում է, որ Երեւանի ավագանու ընտրություններին մասնակցում է հաղթելու նպատակով: Իրո՞ք այդքան մարտական եք տրամադրված:

- Իսկ ինչո՞ւ եք կասկածում, մի՞թե ձեզ համար պարզ չէ, որ Գագիկ Ծառուկյանը ինչ անում է, անում է ամենաբարձր մակարդակով: Մեր ցանկությունն է՝ հաղթել: Մենք մեր համամասնական ցուցակը հենց այնպես չենք կազմել, մեր ցուցակում հասարակությանը հայտնի մարդիկ են: Մեր թեկնածուն  հարգված է եւ որպես ղեկավար, ե՛ւ որպես մասնագետ, ե՛ւ մեր ցանկությունն է, որ ինքը կարողանա ընտրվել եւ նույն գործունեությունը իրականացնել Երեւան քաղաքում: Մենք ընտրությունների գնում ենք հաղթելու համար:

- Դուք ասում եք՝ գնում եք հաղթելու համար, իշխանական կոալիցիայի մյուս անդամները եւս ասում են, որ գնում են հաղթելու համար, ուրեմն կոալիցիայի ներսում ինչ-որ բան ա՞յն չէ, որոշակի առճակատո՞ւմ կա:

- Ոչ մի առճակատում չկա, յուրաքանչյուր քաղաքական ուժ իր աշխատանքով, իր գործով, ժողովրդի մեջ ունեցած իր վստահությամբ մասնակցում է ընտրությանը, եւ շատ կարեւոր է, որ ժողովուրդը եւս մասնակցի ընտրություններին, մարդիկ գնան եւ ընտրեն՝ ում վստահում են, ում հավատում են, ում ծրագրին հավանություն են տալիս: Պետք է մասնակցեն եւ իրենց ձայնը տան այն թեկնածուին, այն կուսակցությանը, այն անձին, ում արած գործերը տեսել են, ում լավ են ճանաչում, ում վստահում են: Եթե ընտրողները իրենց ձայնը տան մեզ, ուրեմն լիարժեք մեր քաղաքապետն է լինելու եւ կատարելու է մարդկանց տված խոստումները, մեր կուսակցության ծրագրերը: Իսկ եթե կոալիցիայի ամեն մի անդամ-կուսակցություն առանձին-առանձին բավարար տոկոսներ չհավաքի, պարզ է, որ պետք է միանանք, ինչի՞ մասին է խոսքը: Բայց այս պահին բոլորս էլ գնում ենք հաղթելու համար, մենք ուզում ենք ստանալ ժողովրդի վստահությունը, ընտրողները պետք է գնահատեն մեր աշխատանքը, մեր թիմը, մեր ծրագիրը: Մենք գնում ենք նորմալ ընտրության, մենք պայքարելու ենք մաքուր ընտրության համար, արդար ընտրության համար:

- «Բարգավաճ Հայաստանն» ինչպե՞ս է վերաբերվում այս ընտրություններին, սա Ձեզ համար քաղաքակա՞ն ընտրություն է:

- Մեզ համար բոլոր ընտրություններն էլ քաղաքական են: Ցանկացած ընտրություն մարդը կամ քաղաքական ուժը պետք է դիտարկի որպես իր ծրագրերի եւ կատարած աշխատանքի ընտրություն: Մենք չենք ուզում հենց այնպես գոյատեւել, այլ ուզում ենք աշխատել, թերությունները վերացնել, թիմը թարմացնել, նորից ու նորից ստանալ ժողովրդի վստահությունը: Այո, հասարակության մեջ այսօր կա մտահոգություն, որ Բեգլարյան Գագիկը, միեւնույն է, արդեն ընտրված է: Բայց Բեգլարյան Գագիկը նշանակված է, ընտրված չէ: Ընտրությունը պետք է լինի մայիսի 31-ին, եւ քաղաքացիները պետք է մասնակցեն եւ ասեն իրենց խոսքը, եւ յուրաքանչյուրի ձայնը շատ կարեւոր է:

- Շատերն են անհանգիստ, որ Երեւանի ավագանու ընտրություններում հանկարծ չկրկնվի «մարտի 1»-ը:

- Ոչ, «մարտի 1» չի կարող լինել: Մենք գնում ենք ընտրության, ժողովուրդը ում ձայն տա, նրան էլ կտա, եւ նա էլ կընտրվի: Մենք միասնական պայքարելու ենք արդար ընտրության համար, այն բանի համար, որ ժողովուրդը իր ձայնը տա նրան, ում նախընտրում է:

- «Բարգավաճ Հայաստանի» նախընտրական կոչերը ե՞ւս լինելու են Դաշնակցության կոչերի նման, դուք ե՞ւս ընդդիմադիր կոչեր եք անելու:

- Մենք երբեք ու երբեք այդպիսի հայտարարություններ չենք անելու, մենք ուրիշին չենք փնովելու, ուրիշի վրա ցեխ չենք շպրտելու: Մենք ասելու ենք՝ տվեք ձեր ձայնը եւ պահանջեք: Մեր խոսքը գործ է: Կա ծրագիր, կա աշխատանք: Մենք քիչ ասել, շատ արել ենք: Մենք մեր հնարավորությունից շատ խոսք ենք տալիս, ավելին անում ենք. դա է մեր բնութագիրը, մեր աշխատանքի ոճը: Իսկ ուրիշի վրա ցեխ շպրտելով՝ հեղինակություն չենք ուզում ձեռք բերել, ցեխ չենք շպրտելու ոչ Դաշնակցության, ոչ ՀՀԿ-ի, ոչ կառավարության, ոչ «Օրինաց երկրի» եւ ոչ էլ ընդդիմության վրա: Ազատ ընտրություն է, մենք գնում ենք ընտրության, եւ մեր խոսքը գործ է:

ԵՐԻՏԱՍԱՐԴՆԵՐԻՆ՝ ՄԱՏՉԵԼԻ ԲՆԱԿԱՐԱՆ

ՀՀ սպորտի և երիտասարդության հարցերի նախարարությունը, նպատակ ունենալով աջակցելու սոցիալապես անապահով երիտասարդ ընտանիքներին, նվազեցնելու արտագաղթը, բարելավելու Հայաստանի Հանրապետությունում ժողովրդագրական իրավիճակը, նախատեսում է իրականացնել պետական օժանդակություն երիտասարդ ընտանիքներին:

ՀՀ սպորտի և երիտասարդության հարցերի նախարար, ԲՀԿ Քաղաքական խորհրդի անդամ Արմեն Գրիգորյանի բարձր հովանու ներքո իրականացվող «Երիտասարդներին՝ մատչելի բնակարան» ծրագիրը կյանքի է կոչվելու երկու ուղղություններով.

-Պետության կողմից 10-15 տարի մարման ժամկետով անտոկոս փոխառության տրամադրում՝ հիփոթեքային վարկի կանխավճարի համար պահանջվող գումարի 30 տոկոսի չափով: Երիտասարդ ընտանիքում անչափահաս երեխաների առկայության դեպքում՝ յուրաքանչյուր երեխայի համար՝ ևս տասական տոկոս:

-Պետության կողմից հիփոթեքային վարկի տոկոսադրույքի մասնակի սուբսիդավորում: Երիտասարդ ընտանիքում անչափահաս երեխաների առկայության դեպքում՝ յուրաքանչյուր երեխայի հաշվարկով կսուբսիդավորվի հիփոթեքային վարկի տոկոսադրույքի գումարի ևս տասական տոկոս՝ մինչև նրա չափահաս դառնալը:

Ծրագրի մասնակցության համար կարող են դիմել 18-30 տարեկան ՀՀ քաղաքացիները, երիտասարդ ընտանիքները (ընտանիք, որտեղ ամուսիններից մեկի տարիքը չի գերազանցում 30-ը, կամ երեխա խնամող միայնակ ծնող, ում տարիքը չի գերազանցում 30-ը)

Կցված փաստաթղթերում տեղադրված է մանրամասն տեղեկություն ծրագրի մասին, ինչպես նաև վերջինիս մասնակցության հայտի ձևը:

«Երիտասարդներին՝ մատչելի բնակարան» Ծրագրի մասնակցության հայտի ձև

ՎԱՐԴԱՆ ԲՈՍՏԱՆՋՅԱՆ՝ «ՀԱՅԱՍՏԱՆԻ ՀՆԱ-Ի ՄԱՍԻՆ ԱՌԱՅԺՄ ՎԱՂ Է ԿԱՆԽԱՏԵՍՈՒՄՆԵՐ ԱՆԵԼ»

Ապրիլի 3-ին հրավիրած ասուլիսում ԱԺ տնտեսական հարցերի հանձնաժողովի փոխնախագահ, «Բարգավաճ Հայաստան» կուսակցության խմբակցության անդամ Վարդան Բոստանջյանը ներկայացրեց, թե ինչ ազդեցություն կարող է ունենալ Համաշխարհային ֆինանսական ճգնաժամը Հայաստանի տնտեսության վրա, ինչպես նաև մեկնաբանեց վերջերս Երևանի ավագանու ընտրությունների մասին մամուլում հայտնված հրապարակումները:

Վարդան Բոստանջյանը նշեց, որ այժմ ՀՀ կառավարությունը վերաբաշխումների անվան տակ ապակողմնորոշիչ քայլ է կատարում և խուսափում է դա որակել որպես պետբյուջեի ծախսերի կրճատում՝ սեկվեստր: Ի պատասխան Հայաստանի ՀՆԱ-ի 3 տոկոս աճի վերաբերյալ Հայաստանի Կենտրոնական բանկի կանխատեսումներին Վարդան Բոստանջյանը նշել է, որ առայժմ վաղ է կանխատեսումներ կատարել:

«Արդյո՞ք այս ընտրությունները նույնպես կանցնեն լարված պայքարում» հարցին պրն Բոստանջյանը պատասխանեց, որ բոլոր ուժերը, որոնք մասնակցում են Երևան քաղաքի ավագանու ընտրություններին, լուրջ են տրամադրված: Մասնավորապես՝ այն հանգամանքը, որ կոալիցիան առանձին է ներկայանում ավագանու ընտրություններին, արդեն նշանակում է, որ ամեն մեկն առանձին է ստանձնում ամբողջ այդ գործընթացի վերահսկողությունը: Իսկ վերահսկելի մեխանիզմները բավական շատ են, մինչև անգամ այնպիսի ուժերի համար, որոնք հակված կլինեն ոչ ընդունելի ճանապարհներով իրենց թեկնածուների համար ավելի շատ ձայն ապահովել:

«Ինչ վերաբերում է «Բարգավաճ Հայաստանին» և կուսակցության ցուցակին, այո, այստեղ հոգատար վերաբերմունք է ցուցաբերված, և ընտրված է այն անձը, ով իրեն դրսևորել է բոլոր կողմերով՝ ստեղծելու, պահպանելու, խնայելու և հասարակությանը և մարդկանց օգնելու առումով: Այդ մարդը Հարություն Քուշկյանն է»,-հավելեց պրն Բոստանջյանը:

ՆԱԻՐԱ ԶՈՀՐԱԲՅԱՆ՝ «ԸՆՏՐՈՒԹՅՈՒՆՆԵՐԻՆ ՄԱՍՆԱԿՑՈՒՄ ԵՆՔ ՀԱՂԹԵԼՈՒ ՀՍՏԱԿ ՆՊԱՏԱԿՈՎ»

ԲՀԿ խմբակցության անդամ, ԱԺ գիտության, կրթության և երիտասարդության հարցերի մշտական հանձնաժողովի փոխնախագահ Նաիրա Զոհրաբյանը, անդրադառնալով Երևանի ավագանու ընտրությունների մասին սոցիոլոգիական կանխատեսումներից մեկին, նշեց, որ շատ լավ գիտի այդ «սոցիոլոգիական հետազոտությունների ֆինալը», որ այդ կանխատեսումները հնամաշ PR տեխնոլոգիաներ են, և ժամանակն է ավարտել տարբեր ճաշակների հարմարեցված և պատվիրված հարցումների էպոպեան: Դրանք ունեն քարոզչական զրոյական ներգործություն և զուրկ են որևէ լուրջ հիմնավորումներից:

«Բարգավաճ Հայաստան» կուսակցությունը հրաշալի գիտի, թե որ կուսակցությունն իրականում ինչ վարկանիշ ունի Երևանում, և չկասկածելով մեր հանդեպ երևանցիների ունեցած հանրային վստահությանը՝ մենք այս ընտրություններին մասնակցում ենք հստակ հաղթելու նպատակով»,-նշեց ԲՀԿ խմբակցության անդամ Նաիրա Զոհրաբյանը: